Er bannað að gefa vinum sínum 2000 krónur?

spurði Guðjón Arnar Kristjánsson ný endurkjörinn formaður Frjálslynda flokksins í fréttum áðan þegar hann var spurður hvað honum fyndist um það að ákveðnir aðilar hefðu greitt einstaklingum fyrir að kjósa rétt í varaformannskjörinu á landsþingi flokksins. 

Á ég að trúa því að sjóaður formaður í íslenskum stjórnmálaflokki sé með svona málflutning? Já því miður virðist lýðræðishugsjónin hjá þeim armi Frjálslynda flokksins sem studdi innkomu Nýs afls í flokkinn og Magnús Þór Hafsteinsson áfram sem varaformann flokksins gegn Margréti Sverrisdóttur vera á þessu plani. Einnig vekur það athygli að einn liðsmanna Nýs afls studdi flokkinn um 200.000 kr. skömmu fyrir landsþingið. Einhvern veginn þurfti að launa það. 

Uppgjör Margrétar Frímannsdóttur við flokkseigendafélag gamla Alþýðubandalagsins vakti verulega athygli nú á haustdögum þegar bók hennar Stelpan frá Stokkseyri kom út. Sú saga sem þar er rakin virðist vera að endurtaka sig hjá nöfnu hennar Sverrisdóttur. Sá er þó munur þar á að Margrét Sverrisdóttir er úr þeim armi Frjálslynda flokksins sem kenna má við flokkseigendur. Það var jú Sverrir Hermannsson faðir hennar sem stofnaði flokkinn og samkvæmt fréttum á hann nafnið á flokknum.

Hvað býr eiginlega að baki þessari aðför að Margréti Sverrisdóttur? Óbeint er það hin nýja afstaða þeirra sem nú ráða för í flokknum í málefnum innflytjenda, sem óneitanlega ber keim af rasískum málflutningi, samanber setningarræðu formannsins. En hvað býr þar að baki? Ég held ekki að það sé pólitísk sannfæring heldur einfaldlega eftirsókn þessara manna í þingsæti, góð laun, þægilega vinnu., skemmtilegt vinnuumhverfi og að ekki sé talað um betri lífeyri en gengur og gerist hjá öðrum þjóðfélagsþegnum.                                                                                     

Jón Magnússon hefur gengið með þingmanninn í maganum frá því á síðustu öld en varð ekkert ágengt innan Sjálfstæðisflokksins. En nú var lag. Mikil fjölgun erlends vinnuafls, sem eins og Jón Baldvin Hannibalsson benti réttilega á í Silfri Egils fyrr í dag, bjargaði íslensku efnahagslífi frá algjöru skipsbroti, kallar á kenndir hjá ákveðnum hóp landsmanna sem flestum meðborgurum blöskra. Á þessar kenndir skyldi spilað svo sitjandi þingmenn og nýliðinn Jón Magnússon og einhverjir með honum komist á þing.  

Margrét Sverrisdóttir á ekkert erindi með þessum mönnum. Það er hennar að ákveða næstu skref. Ég held hins vegar að það sé morgunljóst að þau skref hljóta að leiða hana burt frá íslensku rauðhnökkunum.

Hvar ertu?

-          Geir hef ég iðrast nóg?

-          Þú verður að spyrja Guð að því Árni minn.

-          Guð hef ég iðrast nóg?

-          Þú verður að eiga það við samvisku þína Árni minn.

-          Samviska, samviska. Samviska! Hvar ertu?

Ríkisbúskapur Framsóknar og Sjálfstæðisflokks

Ég keypti 230 grömm af lambalundum í gær, fjórar lundir. Fyrir það greiddi ég um 1000 krónur. Skar þær í smærri bita, marineraði síðan í sterkri sósu í tvo tíma og steikti í wokpotti með grænmeti og hafði nanbrauð með. Úrvalsmáltíð.

Hlustaði á fréttir. Guðni Ágústsson og Árni Mathiesen undirrituðu fyrr um daginn samning við sauðfjárbændur sem á að gilda frá 1. janúar 2008 til 31. desember 2013, samtals í sex ár. Fyrsta gildisárið verða framlög til sauðfjárræktar 3,348 milljarðar króna og lækka svo árlega um 1% á ári á samningstímanum. Varlega áætlað eru þetta um 18 milljarðar króna á þessu tímabili.  

Samkvæmt upplýsingum sem ég fékk hjá samtökum sauðfjárbænda er erfitt að segja nákvæmt til um fjölda sauðfjárbænda, en þeir eru á bilinu 1000 til 2000. Sumir eru í blönduðum búskap en þeir sem eingöngu eru með sauðfjárrækt eru flestir í annarri atvinnustarfsemi einnig, en sauðfjárbú þarf að vera með minnst 1000 fjár til að það geti borið sig.

Meðalgreiðslur til sauðfjárbænda eru því 2,5 milljónir á ári ef við miðum við 2.500 bændur.  Samtals eru um 450.000 fjár í landinu. Það þýðir því að hver rolla á landinu fær 7.500 króna meðgjöf úr ríkissjóði. Sé bóndi með 500 fjár ætti hann að fá um 3.750.000 krónur úr ríkissjóði. Ekki slæmt það.  

Svo er hin hliðin á þessum krónum. Það er ekki bagalegt að geta lofað bændum slíkum fjárhæðum í aðdraganda kosninga og ætla komandi kynslóðum að borga brúsann. Þeir félagar eru báðir í framboði í landbúnaðarhéraðinu Suðurlandi. Þetta kemur jú neytendum til góða sagði Guðni og Árni Matt. reyndi líka að réttlæta þennan ríkisbúskap Framsóknar og Sjálfstæðisflokks. Hver var að tala um að Sovét Ísland heyrði sögunni til?

Heilög Barbara og álverið

Hér fyrr á öldum voru forfeður mínir, ábúendur í Ási þá í Garðasókn en nú í Hafnarfirði, undanþegnir skatti. Í stað þess var ætlast til þess að þeir fylgdu ferðalöngum áleiðis í áttina til Suðurnesja eða Krýsuvíkur, en erfitt var að rata í gegnum Kapelluhraunið úfið og illt yfirferðar. Á leiðinni til Suðurnesja var staldrað við kapelluna og beðið fyrir ferðlöngum við líkneskið af heilagri Barböru, dýrlingi ferðalanga, áður en þeir héldu áfram en Ásfólkið snéri aftur heim.

Nú hefur byggð risið í Áslandinu og einnig í hrauninu fyrir neðan. Við byggð þessari blasir svo álverið. Þar fyrir ofan veg er kapellan ennþá og afsteypa af líkneskjunni af heilagri Barböru.  Nú er komið fram deiliskipulag af stækkun álversins og samkvæmt því virðist eiga að varðveita kapelluna inn í miðri álverslóðinni og verður því heilög Barbara umlukin álveri á báða bóga en almenningur á að geta komist að henni eftir löngum þröngum stíg. 

Þarna er komið heilagt musteri stóriðjunnar verði stækkunin samþykkt í komandi kosningu 31. mars. Ég hef hins vegar fulla trú á því að heilög Barbara muni vísa Hafnfirðingum rétta leið í þeirri kosningu og Sól muni rísa í Straumi og skína áfram á kapelluna og Barböru.

Er Logi föðurbetrungur?

Svei mér þá ef Logi Geirsson er ekki bara föðurbetrungur. Geir Hallsteinsson faðir Loga er einhver besti handboltamaður sem Ísland hefur átt. Ég er á þeim aldri að muna eftir galdrabrögðum Geirs á vellinum. Hann var átrúnaðargoð okkar strákanna í Firðinum á sjötta og sjöunda áratugnum. Troðningurinn í Hálogalandi. Allir sveittir af hitanum og æsingnum þegar FH og Fram áttust við. Þá komu ótrúleg skot frá Geir sem  fengu áhorfendur til að öskra svo þakið af bragganum ætlaði að rifna.

Sama var í kvöld þegar Ísland lagði Túnis 36 – 30 eftir að hafa verið undir 16 – 19 í hálfleik. Seinni hálfleikurinn var einsog leikurinn gegn Frökkum. Þetta lið getur lagt öll lið. Öskrin fyrir framan skjáinn voru ekki minni en í Hálogalandi forðum þegar Logi Geirs fór á kostum. En það var ekki bara hann. Allt liðið var frábært og sýndi eins og íþróttafréttamenn kalla það, ótrúlegan karakter að snúa dæminu svona algjörlega við.  

Á morgun eru það Pólverjar. Áfram Ísland.

Þá unnu Grænlendingar Ástrala 34 - 25 og fengu þar með sín fyrstu stig á HM. Til hamingju.

Dæmt til að misfarast

Samkvæmt fréttum hafa aldraðir og öryrkjar ákveðið að bjóða fram til Alþingis á vori komandi. Helstu talsmenn þessa framboðs eru Baldur Ágústsson fyrrum forsetaframbjóðandi, flugumferðarstjóri og forstjóri Vara og alnafni hans fyrrverandi framkvæmdastjóri Bílaleigu Akureyrar, Arnþór Helgason fyrrum framkvæmdastjóri og formaður Öryrkjabandalags Íslands og Arnór Pétursson fyrrum formaður Sjálfsbjargar – landsambands fatlaðra, Guðbjörn Jónsson sjómaður og fyrrum ráðgjafi og Hannes Sigurðsson fyrrum framkvæmdastjóri Sjálfsbjargar á höfuðborgarsvæðinu.

Ekki skal hér gert lítið úr þeim málstað sem þeir félagar standa fyrir. Okkar ríka samfélag þarf að gera miklu betur við þá sem eiga erfitt með að framfleyta sér. Í þeim hópi eru margir öryrkjar og aldrað fólk. En öryrkjar og einkum og sér í lagi aldraðir eru ekki einsleitur hópur. Fram hefur komið m.a. hjá einum skeleggasta talsmanni aldraðra, Ólafi Ólafssyni fyrrum landlækni, að það séu um 10% aldraðra sem eiga erfitt með að ná endum saman. Sem betur fer hefur stærsti hluti aldraðra það fínt og margir þeirra mjög gott og býst ég við að þeir alnafnar sem eru talsmenn aldraðra í þessu kosningabandalagi líði engan skort.

Það þýðir þó ekki að ekki sé ástæða til að taka á málum þeirra sem sannanlega þurfa á leiðréttingu að halda. Einnig er ljóst að gera þarf stórátak í því að útrýma biðlistum eftir hjúkrunarrýmum. Stjórnarandstaðan hefur haldið uppi málflutningi fyrir þessa hópa og væri nær að þessir aðilar styddu hana í þeirri baráttu að íslenskt samfélag ali önn fyrir sínum minnstu bræðrum og systrum. Eins máls sérframboð af þeim toga sem hér um ræðir eru dæm til að misfarast og verður því dýrmætum atkvæðum kastað á glæ ef af verður. Ég veit að þetta er gömul hræðsluklisja en það liggur einhvern veginn svo í augum úti að þetta framboð er dæmt til að mislukkast. Vinnið ykkar málstað framgang innan þeirra flokka sem þegar eru fyrir hendi.

Merki flokka

Ég fór að hugleiða merki stjórnmálaflokkanna þegar Valdimar Leó setti upp merki Frjálslynda flokksins í beinni útsendingu í Silfrinu. Fyrr í haust hafði hann tekið niður merki Samfylkingarinnar í beinni útsendingu í sama þætti eftir útreiðina í prófkjöri flokksins í haust. Hvað tákna eiginlega þessi merki? Er einhver hugsun á bak við þau? Hver er tilgangurinn með þeim? Eru þau kannski bara til þess að Valdimar Leó geti skipt reglulega um merki í barminum? 

Skoðum merkin aðeins. Fyrst skulum við taka merki Samfylkingarinnar sem Valdimar Leó afhenti Agli í Silfrinu. Lítill rauður áferðarfallegur depill. Kannski táknrænt fyrir fylgi Samfylkingarinnar í dag. Merki Frjálslyndra: hálf groddalegt eins og yfirbragð flokksins er. Vinstri grænir: Var einhver að misskilja eitthvað eða er verið að auglýsa Vegagerðina, arfleifð frá tímum Steingríms í samgönguráðuneytinu. Framsókn: Bæði gamla og nýja merkið eru óttalega Framsóknarleg. Fálka Sjálfstæðisflokksins má leggja út á ýmsan hátt. Sá gamli var tákn sjálfstæðisbaráttunnar en  sá nýi stílfærði minnir frekar á þýskt bílamerki. Svo kviknar alltaf ljóðlínan „ein er upp til fjalla“ í huga manns þegar maður sér merkið. 

Tengdamóðir mín heitin starfaði hér á árunum áður í mötuneyti Alþingis. Hún ákvað að safna barmmerkjum þáverandi flokka á þingi, en flestir þeirra eru nú horfnir. Það gekk greiðlega að fá merkin frá öllum flokkunum nema frá Borgaraflokknum. Hún hafði ítrekað beðið Albert Guðmundsson að útvega sér merkið en einhverjar vöflur verið á knattspyrnuhetjunni, sennilega þar sem merkið hafði ekki verið framleitt. „Það fer að koma,“ var viðbáran. Svo eitt sinn þegar frú Ester spurði Albert hverju liði merkinu þá brást hann við og dró vindil upp úr brjóstvasanum og sagði: „Gjörðu svo vel, hér er merki Borgarflokksins.“ 

Þennan vindil erfði ég síðan og má sjá hann hér á myndinni fyrir ofan. Sennilega er vindillinn besta merki stjórnmálaflokks fyrr og síðar.

Dr. Jekyll and Mr. Hyde

Það var eins og allt annað lið léki gegn Frökkum í kvöld en gegn Úkraínu í gær. Þetta var eins og dr. Jekyll og mr. Hyde. Dr. Jekyll mætti Úkraínu kurteisin uppmáluð og blóðleysið algjört. Í kvöld var það hins vegar mr. Hyde sem mætti með blóðbragði í munninum og algjörlega laus við virðingu fyrir fórnarlambinu. Einbeitingin var algjör og andstæðingurinn fékk að kynnast grimmdinni sem býr innra með liðinu. Og Frakkar steinlágu þrátt fyrir að flestir spái þeim titlinum í ár. 

Til hamingju með sigurinn. Við erum vanir að fara Krýsuvíkurleiðina á svona mótum. Svei mér þá ef strákarnir leika áfram svona þá held ég að enginn standist þeim snúning.

Frjálslyndu flóttamannabúðirnar

Þegar ég heyrði úrslitin í prófkjöri Framsóknar á Suðurlandi skaut þeirri hugsun niður í koll minn að nú bættist Frjálslyndum enn einn liðsmaðurinn. En þar misreiknaði ég mig. Hjálmar Árnason lýsti því strax yfir að hann myndi draga sig út úr pólitíkinni þegar kjörtímabilinu lyki. Öllu meiri reisn er yfir því heldur en að hlaupa inn í pólitískar flóttamannabúðir Frjálslyndra.

  

Það hlýtur að vera áhyggjuefni fyrir Suðurnesjamenn að ekki er útlit fyrir að þeir muni fá neinn þingmann í vor. Þetta svæði er talsvert frábrugðið landbúnaðarhéruðunum á Suðurlandi og útvegsbænum Vestmannaeyjum. Á Suðurnesjum má búast við mikilli gerjun á komandi árum eftir að herinn er farinn og því slæmt fyrir svæðið að eiga ekki fulltrúa á þingi.

En aftur að Frjálslyndum. Sá Valdimar Leó lýsa því yfir í Silfrinu að hann væri horfinn í flóttamannabúðirnar enda svifi kratismi þar yfir vötnum. Og nú herma fréttir úr bloggheimum (Sjá HUX-Péturs Gunnarssonar) að Kristinn H. Gunnarsson fari fram í fyrsta sæti í Norðvesturkjördæmi og Guðjón Arnar flytji sig til Reykjavíkur. Þetta á þó allt eftir að skýrast um næstu helgi þegar uppgjörið fer fram hjá Frjálslynda flokknum.

Spýtið í lófana

Það fór eins og ég mig grunaði. Úkraína var sýnd veiði en ekki gefin. Eftir þokkalegan fyrri hálfleik hjá strákunum, þrátt fyrir fjölda sendingamistaka, hrundi leikur liðsins í seinni hálfleik og Úkraína valtaði yfir okkur. Það má mikið gerast ef við ætlum að komast upp úr riðlinum, einungis sigur gegn Frökkum gerði slíkt mögulegt og tel ég slíkt afar fjarlægan draum miðað við hvernig þessi tvö liða hafa leikið fram til þessa. Við lifum þó áfram í voninni. Við lögðum jú Svía á leiðinni í keppnina og því ekki Frakka sem þegar eru komnir áfram og hafa því ekki að jafn miklu að keppa og við.

  

Óheppni Íslendinga í riðlakeppninni fólst ekki síst í því að mæta Áströlum í fyrstu umferð. Úrslitin í þeim leik virðast hafa truflað einbeitingu liðsins. En það er keppt í fleiri riðlum en okkar. Á morgun verður lokaleikur frænda okkar Grænlendinga og leika þeir gegn Kúveit. Bæði þessi lið eru með núll stig fyrir lokaleikinn og mikið væri ánægjulegt ef Grænlendingum tækist að næla sér í stig.

  

Það er víðar en í Þýskalandi andbyr að mæta. Samfylkingin virðist í frjálsu falli miðað við niðurstöðu skoðanakönnunar Fréttablaðsins. Ekki kann ég önnur ráð fyrir Samfylkinguna en fyrir handboltalandsliðið. Spýtið í lófana fyrir lokaátökin.

Til hamingju Framsókn með tvo nítjándu aldarmenn í forystu á Suðurlandi.