Þaggið rasismann í hel

Fylgdist með kosningasjónvarpi RÚV í gær og í kvöld. Þættirnir eru upplýsandi og stjórnendur hafa staðið sig með prýði og það sama má segja um flesta frambjóðendur. Eitt vil ég þó setja út á en það er hversu mikla athygli og stórum hluta af takmörkuðum tíma þáttanna er varið í rasíska stefnu „Frjálslyndra“ í garð útlendinga. Í þættinum í kvöld um utanríkismál fékk Magnús Þór að halda langt eintal um „innflytjendavána“. Af hverju var ekki frekar rætt um stuðning ríkisstjórnarinnar við harmleikinn í Írak. Ræðum alvöru mál en leyfum ekki „Frjálslyndum“ að vaða á súðum og ala á ótta við innflytjendur.

 Það er hins vegar aðdáunarvert hvað fulltrúar allra annarra framboða eru sammála um að fordæma þennan málflutning. Innflytjendapólitík „Frjálslyndra“ hefur ekkert með utanríkismál að gera. Hún er vinsældaveiðar flokksins í gruggugum polli lægstu hvata kjósenda. Skoðanakannanir sýna sem betur fer að þær veiðar ganga ekki vel því flokkurinn mælist nú með lægra fylgi en fyrir þennan veiðitúr. Fyrst þegar þessi stefna var kynnt virtist fylgið taka kipp en ég reikna með að fylgi fyrrverandi stuðningsmanna hafi hrunið af flokknum við klofninginn að ég tali ekki um þegar grímulausar auglýsingarnar fóru að birtast. Íslenska þjóðin er að upplagi gestrisin og kann auk þess að þakka vel unnin störf í þágu samfélagsins.

Framsókn þarf fixið sitt

Hafnfirðingar höfnuðu stækkun álversins en samt er rætt um að stækka það. Jú það var ekki kosið um stækkun álversins heldur einungis deiliskipulag, segja þeir. Samt vita allir að það var kosið um stækkun. Engu að síður eru menn að hugleiða að hunsa vilja kjósenda. Og Jón Sigurðsson segir að ekkert hafi verið að marka atkvæðagreiðsluna.

 

Um 60% þjóðarinnar vill stóriðjustopp. Samt er rætt um að reisa álver í Helguvík, á Keilisnesi, við Þorlákshöfn og á Húsavík. Er mönnunum ekki sjálfrátt? Er þeim alveg sama um vilja þjóðarinnar? Eru þeir tilbúnir að afhenda fjölþjóðlegum fyrirtækjasamstæðum þá takmörkuðu orku sem við búum að? Og Jón Sigurðsson segir að ekkert sé að marka niðurstöðu skoðanakönnunarinnar.

 

Samfylkingin boðar Fagra Ísland. Engu að síður koma þingmenn flokksins og mæra uppbyggingu stóriðju í sínu kjördæmi, Kristján Möller á Húsavík og Jón Gunnarsson úr Vogum vill að Alcan reisi álver á Keilisnesi. Þetta er ekki gott veganesti fyrir okkur Samfylkingarfólk í komandi kosningum.

 Jón Sigurðsson segir að stóriðjustefnunni sé lokið engu að síður vill hann að ráðist verði í allar álvershugmyndir sem dúkka upp. Þetta er afneitun vímefnasjúklingsins á hæsta stigi. Framsókn verður að fá fixið sitt. En hún er líka komin á það stig neyslunnar að hún þarf að fara í langa meðferð ætli hún að ná sér einhverntíman á strik aftur. Ef ekki þá veslast hún upp.

Jón ekkert að marka

Jón Sigurðsson formaður Framsóknarflokksins segir að ekkert sé að marka niðurstöðu íbúakosningarinnar í Hafnarfirði um stækkun álversins. Niðurstaðan sé bara leiðbeinandi en ekki bindandi. Jón Sigurðsson iðnaðarráðherra segir að ekkert sé að marka útkomuna í skoðanakönnun Gallups þar sem 60% landsmanna sögðu að tími væri kominn á stóriðjustefnu stjórnavalda. Jón segist ekki einu sinni hafa skilið spurninguna. Jón Sigurðsson viðskiptaráðherra segir að ekkert sé að marka skoðanakannanir þar sem Framsókn mælist með bjórfylgi. Næst mun Jón Sigurðsson ekki þingmaður lýsa því yfir að ekkert sé að marka niðurstöðu kosninganna í vor þegar hann verður áfram ekki þingmaður.

Því Guð býr í gaddavírnum amma!

Í tilefni dagsins skruppum við í Saurbæjarkirkju á Hvalfjarðarströnd og skoðuðum þar skemmtilega sýningu á verkum fjölmargra íslenskra myndlistarmanna sem túlkuðu Hallgrím Pétursson hver á sinn hátt. Var skemmtilegt að virða fyrir sér persónulegt handbragð listamannanna á verkefninu. Það er ekki auðvelt að gera upp á milli þeirra en mest höfðaði mynd Húberts Nóa til mín, en það er bara mitt persónlega mat.

 

Á morgun verður meistari Megas með tónleika í kirkjunni þar sem hann flytur passíusálmana. Við hæfi var að einn listamannanna birti ljósmynd af Megasi og var hann eflaust að höfða til þess að Megas væri nútíma sálmaskáld, en því má heldur ekki gleyma að Hallgrímur orti mikið af veraldlegum vísum og ljóðum.

 

Á leiðinni uppfrá kirkjunni stoppuðum við og skoðuðum uppsprettu lindarinnar sem séra Hallgrímur laugaði sig í eftir að hann hafði fengið holdsveikina.

 

Hvalfjörðurinn skartaði sínu fegursta í dag. Sól skein í heiði og þótt gróðurinn sé ekki enn farinn að taka við sér var vor í lofti. Fjöldi höfuðborgarbúa sá ástæðu til að skreppa í bíltúr upp í Hvalfjörð og í fjörunni við Fossá voru fjölmargir að tína krækling enda stórstraumsfjara. Ótrúlegt að fólk hafi bölvað þessum krók á árunum áður. Mun skemmtilegra útsýni en ofan í göngunum, þótt óneitanlega séu þau stórkostleg samgöngubót.

 

Hver er dáinn? spurði strákurinn okkur, því við kirkjuna, Ferstiklu og víðar var flaggað í hálfa stöng. Já enn eitt árið er þess minnst að Jesús var krossfestur á Golgata fyrir tæpum tvö þúsund árum. Ég man að þegar ég var yngri var þessi dagur sá heilagasti og fannst okkur börnunum hann því einn sá leiðinlegasti. Í dag er heldur ekki eins og hver annar helgidagur í huga mínum þótt ég teljist seint í hópi trúaðra einstaklinga. Nei það er uppeldið, hefðin og hin stórbrotna saga Krists sem veldur því.

 Því Guð býr í gaddavírnum amma!

Rebbi í stríð við innflytjendur

Á seinni hluta fyrstu þúsaldar eftir Krist var hér einn fulltrúi landspendýra. Það var rebbi karlinn. Hafði komið hingað á hafís frá Grænlandi. Hann er hinn upprunalegi landnemi Íslands. Hér var gnótt matar, fuglalíf mikið og árnar fullar af fiski. Rebbi lifði hér sældarlífi enda enginn að keppa við hann um fæðuna. Honum fjölgaði því ört og nam nýjar lendur í suðri. En einn góðan veðurdag komu skektur af hafi með nokkra munka frá Írlandi og rebbi var ekki lengur einn um hituna í þessu landi. Og einhverjum árum seinna komu stærri skip  með fjölda innflytjenda og búfénað og hafði nú fánan fengið mikla fjölbreytni. Þetta var rebba að skapi því nú jókst fjölbreytnin á gnægtaborðinu. Lömbin voru í uppáhaldi.

 

Fjölbreytileiki tegundanna jókst statt og stöðugt. Einhvernveginn barst hagamúsin hingað og seinna húsamúsin og að lokum rotturnar. Síðan flutti maðurinn inn minkinn, en sá vargur slapp út og lagðist á fugla og fisk. Hann er nú réttdræpur hvar sem til hans næst og einnig er leyfilegt að plaffa á rebba.

 

Það er jú maðurinn sem hefur þraukað í þessu landi í yfir þúsund ár sem setur reglurnar. Íslenska þjóðin sem er upphaflega afrakstur blöndunar kelta og norrænna manna og síðar meir kemur blóðblöndun frá öðrum Evrópulöndum og frá öðrum heimsálfum. Hver man ekki eftir fregnum af því að Davíð í Svörtuloftum sé með svart blóð í æðum. En þjóðin var ekki bara í því að taka á móti heldur gaf hún einnig af sér. Íslendingar hafa frá örófi sest að í öðrum löndum og blandast þar íbúum viðkomandi lands. Vesturfararnir á seinni hluta 19. aldar eru bara eitt dæmi um slíka blöndun.

 

Í dag birtist aftur auglýsing „Frjálslyndra“ um Ísland fyrir Íslendinga. Refirnir Magnús Þór og Jón Magnússon vita að þjóðin er eins og þverskurður annarra þjóða og því örugglega jarðvegur hér fyrir rasískar skoðanir sem gætu ef spilað er á þessar lágkúrulegu hvatir fleytt þeim á þing. Afleiðingarnar skipta þá engu máli. Það eina sem skiptir máli er þingsætið. Tilgangurinn helgar meðalið.

 

Refurinn Jón Magnússon hefur gengið með þingmanninn í maganum frá unga aldri og Magnús Þór vill ekki þurfa að sækja um aðra vinnu.

 Hingað til hefur ekkert sérstakt vandamál skapast vegna nýbúa hér á landi. Upp til hópa er þetta iðjusamt fólk sem reynir að aðlagast þessu samfélagi. En með útspili „Frjálslyndra“ gætu verið í uppsiglingu erfiðir tímar fyrir okkur öll.

Frekar stopp en afturábak

Skoðanakönnun Félagsvísindastofnunnar fyrir Stöð 2 vegna kosningasjónvarps stöðvarinnar sýnir að stóriðjustefnan er komin í þrot. Framsóknarflokkurinn býður afhroð þrátt fyrir uppbygginguna í Fjarðabyggð og loforð um álver á Húsavík. Flokkurinn slefar inn einum þingmanni. Þetta þýðir bara eitt. Kjósendur eru að átta sig á afleiðingum þessarar einstrengings stefnu. Hátt vaxtastig sem hefur kostað meðalfjölskylduna í landinu hálfa milljón á ári vegna þenslunnar sem af þessu hlýst.

 Framsókn talar um stöðnun ef vinstri flokkarnir komast til valda. Flokkurinn er með auglýsingu á fréttavefjum mbl og visis þar sem varað er við stoppi. Þar segir: Árangur áfram ekkert stopp og svo birtist grænn kall (ekki kona) eins og á umferðarljósi þegar ganga má yfir. Það merkilega við þennan göngukarl Framsóknar er að hann mjakast aftur á bak en ekki áfram. Því segi ég: Frekar stopp en afturábak eins og Framsókn boðar með stóriðjustefnu sinni.

Lögreglu sigað á unglinga að leik

Vorið er komið. Trjágróður byrjaður að bruma og farfuglarnir að nema land (hvernig er það annars Magnús Þór á ekki að banna þeim að koma líka, þeir geta jú flutt með sér sjúkdóma og sumir eru hálfgerðir vargar). Fyrirgefið þennan útúrdúr. Nema galsi hleypur í ungviðið þegar hlýnar í lofti og stundum eru unglingarnir einsog kálfar þegar þeim er loksins hleypt út í sumarbyrjun. Eðlilega fylgir því smá hávaði og sumum kann að finnast slíkt ónæði en að siga lögreglu á unglinga að leik er ansi langt gengið. „Hypjið ykkur heim og hagið ykkur eins og eðlilegir unglingar og drepið mann og annan í tölvuleikjum en verið ekki í boltaleik hér á þessu leiksvæði. Slíkt má einungis stunda þegar fullorðnir eru úti að vinna. Nú þurfa þeir frið og ró.“

 

Tilefni þessara skrifa er eftirfarandi frétt sem birtist á visir.is í gær:

 „Lögreglan á höfuðborgarsvæðinu þurfti að hafa afskipti af unglingum á nokkrum stöðum á svæðinu seint í gærkvöldi, en ekki vegna ölvunar eða óspekta, heldur leikja. Fólk í grennd við leiksvæði og leikvelli kvartaði yfir gáska í krökkunum, sem voru í boltaleikjum og höfðu ekki hemil á vorleiknum, sem hlaupinn var í þá. Unglingarnir tóku tilmælum lögreglu vel, enda hafði hún skilning á útivist krakkanna svona seint, þar sem páskafrí er nú hafið í skólum.“

 

Hættuástand í Reykjavík

Maður er nefndur Reymond Henault. Hann hlýtur að eiga mjög hættulega óvini hér á landi því þegar hann ferðaðist á milli húsa í Reykjavík fylgdu honum sex mótórhjólalöggur og þrír löggubílar. Ég hef reyndar aldrei heyrt þennan mann nefndan áður og býst við að það sama gildi um yfir 90% þjóðarinnar þannig að þessi örfáu prósent sem vissu um tilvist hans hljóta að bera þungan hug til mannsins.

 

Henault mun vera formaður hermálanefndar NATO og var hann í heimsókn hjá Valgerði utanríkisráðherra um og upp úr hádegi í dag. Þar sem utanríkisráðuneytið er andspænis vinnustað mínum komst ég ekki hjá að verða vitni að heimsókninni. Eins og ég sagði þá voru mótórhjólalöggurnar sex þegar gestinn bar að garði og þrír löggubílar. Á meðan á fundinum stóð, en það var í um tvo tíma, spígsporuðu auk einkennisklæddu lögregluþjónanna nokkrir massaðir óeinkennisklæddir einstaklingar fram og aftur á tröppunum og stéttinni fyrir framan ráðuneytið. Sennilega lífverðir herra Henault og félaga hans. Ekki var gott að sjá hvort þeir bæru vopn en ég reikna alveg eins með því. Þetta var eins og klippt út úr bíómynd.

 

Löggubílarnir, hjólin og bílakostur gestanna voru í gang allan tímann sem fundurinn stóð. Ekki verið að spá í útblástur þar. Allt í einu kom hreyfing á mannskapinn. Lögregluþjónarnir stilltu sér upp í réttstöðu og yfirlífvörðurinn hljóp fyrir hornið til að kanna hvort basúkaskytta væri nokkuð stödd í brekkunni en svo reyndist ekki. Gaf hann þá skipun í gegnum símann um að öllu væri óhætt og opnuðust þá dyr ráðuneytisins og nokkrir misskrautlegir lautenantar og admírálar gengu út og fóru í bílana undir vökulu augnaráði þeirra sem gættu þeirra. Yfirlífvörðurinn settist inn í fremsta löggubílinn á eftir þremur mótorhjólum og svo var ekið af stað.

 Mikið hefði verið gaman að hafa teygjubyssu á skrifstofunni.

Hreinsunargusturinn í Kaldárseli

Skrapp upp í Kaldársel í dag til þess að láta íslenska veðráttu, hraunið og mosann hreinsa heilabúið eftir orrahríð undanfarinna vikna. Þetta var ekki hreinsunareldur heldur hreinsunargustur. Engu að síður er hraunið í Kaldárseli, að ekki sé talað um móbergshrúgaldið Helgafell sjálfsagður hluti af elfjallaþjóðgarðinum sem andstæðingar stóriðjustefnunnar hafa talað um. Með niðurstöðunni í gær er sá möguleiki nær en margur hyggur.

 

Þetta var eins og fyrr sagði hreinsunargustur sem okkur stendur öllum til boða, öllum íbúum þessa lands sem og gestum okkar. Því er ég að hamra á þessu að heilsíðu auglýsing „Frjálslynda flokksins“ sem blasti við mér og öðrum landsmönnum með morgunkaffinu í morgun, „Ísland fyrir Íslendinga“ var eins og löðrungur eftir atburðarás gærdagsins. Gengur stjórnmálaafl á 21. öld á Íslandi virkilega svona langt í kynþáttafordómum og elur á lægstu hvötum mannsins?

 

Þessi flokkur verður ekki stjórntækur eftir kosningar. Gleymið kaffibandalaginu. Ég vil að Samfylkingin og Vinstri grænir lýsi því yfir strax að flokkur með þennan málflutning sé ekki hæfur til samstarfs.

 

Horfði á varaformanninn Magnús Þór í Silfri Egils verja þennan málstað, auk þess sem hann tók upp hanskann fyrir frambjóðanda flokksins í 5. sæti í öðru hvoru Reykjavíkurkjördæmanna, en sá hefur gengið enn lengra í sínum rasisma á bloggsíðu hér hjá MBL.

 

Hann talar um nýbúa frá Austur – Evrópu sem heilbrigðisvandamál, félagsvandamál, glæpahyski sem stundi mansal og eiturlyfjasölu og ég veit ekki hvað. Hann lýkur færslu sinni með því að það sé nauðsynlegt að verja íslenska menningu og íslensk gildi. Mér er spurn. Hvað í ósköpunum er það?

Nei Ísland er ekki einungis land innflytjendanna fyrir 1200 árum. Ísland er allra. Það eiga allir að geta notið hreinsunargustsins í Kaldárseli.

Stórsigur lýðræðisins

Í stórum dráttum var þessi færsla tilbúin áður en niðurstaða var fengin í atkvæðagreiðslunni um stækkun álversins. Atkvæðagreiðslan í Hafnarfirði var stórsigur lýðræðisins. Sú ákvörðun meirihluta samfylkingarinnar í Hafnarfirði að vísa þessu stóra máli til íbúa Hafnarfjarðar var djörf ákvörðun en hefur sýnt sig að þetta var rétt ákvörðun. Metþátttaka bæjarbúa í atkvæðagreiðslunni, 76,6%, sem er talsvert meira en í síðustu bæjarstjórnarkosningum, sýnir að bæjarbúar vilja fá að hafa eitthvað um framtíð síns bæjarfélags að segja.

 

Sigur þeirra sem voru á móti stækkun var tæpur en horfa verður á hann í ljósi þess ójafnræðis sem var í sjálfri kosingabaráttunni. Annarsvegar var fjölþjólegt stórfyrirtæki með fjárhirslur sem minna á peningatank Jóakim aðalandar og hins vegar almannasamtök smáanda  borð við sjálfan Andrés önd. Eða eins og Ómar Ragnarsson sagði; Davíð lagði Golíat.

 Ég horfði á viðtal við félaga Lúðvík Geirsson í kvöld.  Þetta var djörf ákvarðanataka hjá meirihlutanum að láta bæjarbúa um að gera út um þetta stóra skipulagsmál. Hann hefur staðið vel að útfærslunni og á heiður skilið fyrir. Staða hans hefur ekki verið auðveld en ég dáist að því hvernig hann hefur komist frá því. Lýðræðislegur vilji bæjarbúa fékk að ráða um framtíðarskipan skipulagsmála á strandlengjunni suður af Hafnarfirði. Nú getur við farið að horfa til framtíðar.