Gleðilegt sumar

Skruppum á Þingvöll og treystum vor heit. Skafheiður himinn og stilla. Skoðuðum fræðslumiðstöðina fyrir ofan Almannagjá. Þetta er vel heppnuð bygging og margmiðlunartæknin nýtt til að koma sögu og jarðfræði staðarins til skila. Þá er flekarekið undanfarin 1000 ár skemmtilega útfært og kvikmyndin af fjölskrúðugu lífinu undir yfirborði Þingvallavatns  á gafli salarins rammar rýmið skemmtilega inn.

 

Það frábærasta við þetta allt er að þetta kostar ekkert. Það þarf ekki að borga inn. Það þarf ekki að setja hundrað kall í margmiðlunartækin. Þetta er bara þarna fyrir okkur öll. Það hefur vissulega komið upp umræða um að taka aðgangseyri að náttúruperlum til að kosta framkvæmdir og umsjá svæðanna. Ég vona bara í lengstu lög að við komumst hjá því. Efast um að ég hefði skroppið á Þingvöll í dag ef það hefði kosta 500 kall inn. Hefði sjálfsagt hugsað sem svo að ég væri búinn að koma þangað það oft að engin ástæða væri til að henda fimmhundruðkallinum.

 

Gengum niður Almannagjá og niður á bílastæðið. Þaðan héldum við svo út að Þingvallakirkju. Eins og flestar aðrar kirkjur var hún læst. Hversvegna eru öll guðshús lokuð almenningi nema þegar prestur vill stíga í stól? Spurði séra Baldur í Vatnsfirði að því sl. sumar og hann sagði að það væri til þess að Framsóknarmenn vanhelguðu ekki guðdóminn.

 Þessi siður okkar Íslendinga að halda upp á sumardaginn fyrsta er frábær. Í ár frusu saman vetur og sumar og það veit á gott sumar samkvæmt þjóðtrúnni og við trúum því þar til annað kemur í ljós. Í dag var bjart yfir Íslandi og eftir að hafa horft á þátt Stöðvar 2 um mitt kjördæmi í gær veit ég að með rísandi sól mun landinn rísa upp og hafna núverandi stjórnarherrum.

Athugasemdir

[Torfi Stefán Jónsson (IP-tala skráð) 20.4.2007 kl. 13:50]

Sæll Sigurður, hér kemur smá ábending varðandi kirkjuna á Þingvöllum.

Hún er opin á sumrin frá um 10-18. Ástæða þess að hún er lokuð á veturna er meðal annars vegna þess að hana þyrfti að þrífa, ryksuga og fá meiri umsjón ef hún væri opin. Einfaldlega ekki starfsfólk til þess á veturna. Annars er framsóknarsvarið alveg fullgott