Frjáls minkur í frjálsu hænsnabúi

Frjálshyggjan er frjáls minkur í frjálsu hænsnabúi, segir Einar Már Jónsson í nýrri bók, Bréfi til Maríu. Einar Már er doktor í miðaldasagnfræði og kennir við Svarta skóla í París. Hann segir að frjálshyggjan stefni að niðurbroti velferðarsamfélagsins. Sagt var frá útkomu bókarinnar í Speglinum í kvöld.

Þetta var góður inngangur að fréttum af  landsfundi Sjálfstæðisflokksins í kvöld. Það versta við þennan frjálsa mink er að alltaf rétt fyrir kosningar, þegar hann veit að það á að fara að vísa honum út úr hænsnabúinu, þá er Hannes yfirminkur sendur í útlegð tímabundið og hinir klæðast dulargerfi svo þeim verði aftur hleypt inn að lokinni talningu.

 

Sjálfstæðisflokkurinn hefur verið við stjórn frá 1991. Fyrstu fjögur árin með gamla Alþýðuflokknum en síðan með Framsókn. Á þessum eina og hálfa áratug hafa frjálshyggjuminkarnir fengið úr nógu að moða í íslenska hænsnabúinu. Þeir hafa rifið til sín bankana, símann og fleiri eignir þjóðarinnar og greitt fyrir það smánarlega lágar upphæðir miðað við þau verðmæti sem þeir ginu yfir. Eftir sátu svo þeir hópar sem hafa haft úr minnstu að moða, öryrkjar, stór hópur aldraðra, einstæðir foreldrar o.fl.

 Nú hins vegar þegar dregur að kosningum varpar Sjálfstæðisflokkurinn yfir sig velferðarskikkju og segist ætla að bæta hag þessara hópa. Þetta var líka gert fyrir síðustu kosningar og minkurinn komst aftur að gnægtaborði  hæsnabúsins. Ekki var staðið við stóru orðin þá heldur var haldið áfram á braut einkavinavæðingar og að bæta hag þeirra sem nóg höfðu fyrir. En velferðarskikkjan er orðin ansi trosnuð og kjósendur farnir að sjá glitta í frjálsa minkinn í gegnum götin auk þess sem það gleymdist að senda Hannes burt og  slær hann hvert vindhöggið á fætur öðru í vonlausu vopnaglamri sínu við Stefán Ólafsson sem hefur flett hulunni af „velferðaráherslum“ stjórnarflokkanna.

Athugasemdir

[halkatla, 12.4.2007 kl. 22:48]

þetta minnir mig á orðatiltækið "the truth is out there"

[Jón Ingi Cæsarsson, 12.4.2007 kl. 23:12]

Heyrði þetta eimitt. Næsta bráð frjálshyggjuminksins er Landsvirkjun og svo kannski Pósturinn. Minkinn langar líka dálitið að éta vatnsveitur..sennilega til að skola niður Símanum og bönkunum. Tókuð þið eftir því að Síminn sem hefur grætt milljarða á ári í meira en ártug..tapaði þremur milljörðum svona á fyrsta ári í einkaeign.

[Gunnar Freyr Rúnarsson, 13.4.2007 kl. 06:48]

Hannes H. hefur reyndar alltaf farið í frí fyrir kosningar, þegar flokkurinn hefur viljað færa sig inn á miðjuna í nokkrar vikur.  Síðan birtist karlinn alltaf hress og sprækur á kosninganótt.  Núna er hins vegar Geirklíkan (Geir, Villi og Guðlaugur) við völd hjá íhaldinu og hafa ekki umboð til að senda hann í frí.  Eða hvað á maður að halda! 

[Sigurður Karl Lúðvíksson, 13.4.2007 kl. 13:12]

Bíddu...höfðu öryrkjar og gamalmenni það svo rosalega gott hérna áður fyrr, held ekki, hafa allaveganna kaupmátt núna. Frjálshyggjan snýst um að koma rekstri fyrirtækja úr höndunum á óhæfu fólki sem hefur akkúrat enga hagsmuna að gæta af rekstri félaganna (ríksstjórnum), í hendurnar á fólki sem hefur beina hagsmunalega tengingu við gengi rekstursins, fólk sem er látið fjúka ef illa gengur. Ríkið er að mestu uppfullt af sagnfræðingum, íslenskufræðingum og kennurum sem hafa nákvæmlega ekki hundsvit á rekstri fyrirtækja. Grunnsetning hagfræðinnar segir að auðlindir jarðar eru takmarkaðar og það sé hlutverk hagfræðinnar að skipta þeim með mönnunum á sem hagkvæmastann hátt. Allt annað er þá sóun á auðlindum sem leiðir til meiri fátæktar. Þetta veit hvert það mannsbarn sem hefur opnað hagfræðibók (og skilið hana). Segi nú ekki endilega að sjálfstæðismenn hafi alltaf staðið sig vel í því en þó líklegri til þess en aðrir. Bara að árétta hver hugsjónin er á bakvið frjálshyggjuna því þið virðist ekki skilja hana.