Grátt ætlar allt grænt að gleypa

Sáttmáli Framtíðarlandsins sem ber yfirskriftina grænt eða grátt er um margt merkilegt plagg. Bara það að svona stefnumarkandi manifesto um framtíðar umhverfisstefnu þjóðarinnar skuli gert eru heilmikil tíðindi. Þá vekur það athygli hverjir standa að þessum sáttmála. Það eru m.a. fyrrverandi forseti lýðveldisins, fyrrverandi forsætisráðherra og fyrrverandi biskup þjóðkirkjunnar, Vigdís, Steingrímur og Sigurbjörn. Þá eru í hópnum fjölmargir einstaklingar sem hafa skarað fram úr í listum, íþróttum, vísindum og á fleiri sviðum. Allt þjóðkunnir einstaklingar sem við berum virðingu fyrir. Það er erfitt fyrir þjóðina að neita að hlusta á þetta fólk.

 

Yfirskriftin: Grænt eða grátt rifjaði upp fyrir mér sumarið 1982 þegar ég vann hjá Hagvirki sem þá hafði tekið að sér Sultartangastíflu. Á tímabili var ég staddur í Hafnarfirði við að steypa byggingareiningar sem fluttar voru upp á hálendið. Dag eftir dag, viku eftir viku vorum við að steypa sömu gráu eininguna. Þá varð til hjá mér eftirfarandi staka:

Slynga,slóttuga
sleipa
steypa, stein-
steypa
hatri í hjartað
munt hleypa
geggjun í geðið
greipa
Steypa, stein-
steypa
Grátt ætlar allt grænt
að gleypa.

 Hvað felst svo í sáttmálanum? Það að áður en ráðist verður í nokkrar frekari virkjunar- eða

stóriðjuframkvæmdir verði búið að afgreiða og samþykkja fyrsta og annan áfanga Rammaáætlunar um nýtingu vatnsafls og jarðvarma og að Rammaáætluninni í heild verði gefið lögformlegt vægi. Þar til því ferli er lokið verði ekkert frekar aðhafst í stóriðju- og virkjanauppbyggingu. Þetta útilokar ný álver í Helguvík og á Húsavík, sem og stækkun álveranna í Straumsvík og í Hvalfirði á tímabilinu. Á meðan þessu ferli stendur verði ekki leitað hófanna með aðrar virkjanir, hvort sem þær falla í umhverfisflokk A, B eða C samkvæmt núverandi skilgreiningu Rammaáætlunar. Ennfremur verði engum frekari rannsóknarleyfum úthlutað á þessu tímabili. Þá verði íslenska ákvæðið í Kyoto-bókuninni ekki notað frekar en þegar hefur verið gert vegna Kárahnjúkavirkjunar og álvers á Reyðarfirði.

  

Horfði á fulltrúa fjögurra stjórnmálaflokka í Silfri Egils. Það voru Össur fyrir Samfylkinguna, Einar Guðfinnsson fyrir Sjálfstæðisflokkinn. Siv fyrir Framsókn og Steingrímur fyrir VG. Þegar maður mátar málflutning þessara fulltrúa við sáttmála Framtíðarlandsins er ljóst að einungis tveir stóðust prófið, Össur og Steingrímur. Þá hefur komið fram að Frjálslyndir eru með „hóflegri stóriðju“.

  

Umhverfismálin eru mikilvægasti málaflokkurinn fyrir komandi kosningar og skoðanakannanir sýna að þau munu vega þungt þegar kjósendur greiða atkvæði. Kosningarnar munu snúast um grænt eða grátt. Fyrst mun reyndar reyna á okkur Hafnfirðinga 31. mars þegar við ákveðum hvort stærsta álver Evrópu verði staðsett í miðjum bænum. Eða eins og ég var spurður um í dag: Hvenær ætla Reykvíkingar að krefjast álvers til að bjarga borgarsjóði?

Athugasemdir

[Bjarni Magnús (IP-tala skráð) 18.3.2007 kl. 20:23]

 

Er landið ekki aðallega að verða "grátt" vegna landfoks?    Skrítið að þessi umhverfissamtök minnast ekkert á það sem vandamál hvað umhverfið varðar - er þarna einhver  tvískinnungar á ferð, eða er þetta vegna þess að þarna er engu hægt að mótmæla nema þá kannski náttúrunni sjálfri?   Þetta fólk sem hefur það næs hér á suðvesturhorninu, einblínir í raun á að setja náttúruna ofar mannfólkinu, þannig að fólki, sérstaklega á norðurhluta landsins verði allar bjargir bannaðar.  

[Grímur Kjartansson, 18.3.2007 kl. 22:00]

Ég sé ekki heiminn í svart/hvítu eða í þessu tilfelli grænu/gráu og tel ekki rétt að vera múlbinda mig við 1 möguleika af mörgum.
Þeir sem skrifa þarna undir ættu að íhuga hvernig undirskrift þeirra verður nýtt  -  ég er allavega ekki tilbúinn að skrifa uppá að reiknikúnstirnar hjá Andra Snæ séu óskeikular einsog orð páfans.

[María J. (IP-tala skráð) 19.3.2007 kl. 00:30]

 

Nei ég held að það sé nokk víst að Andri ætti að halda sig við að skrifa barnabækur og nafna mín við líklist.   Mannvonskan gagnvart núlifandi fólki sem byggir landið er skelfileg.

[Baldvin Jónsson, 19.3.2007 kl. 02:11]

Ég er ekki viss um að ég hafi verið að lesa sömu bók og þið Græimur og María.  Ef að þið hafið lesið Draumaland Andra til enda þá snýst bókin um fyrir mér a.m.k. að velta upp fleiri hugmyndum. Að koma með nýjar lausnir.  Er það nokkuð annað en mannvonska að ætla fólki á landsbyggðinni bara að vinna í Álveri ef það á annað borð ætlar að "halda út" þarna eins og manni finnst oft hugsunin vera hjá ráðamönnum þjóðarinnar.

Er ekki kominn tími á að fá fram með frjórri hugsun nýjar hugmyndir í stað þessara stöðugu "meðsvomikiðsamviskubityfiraðhafatekiðafþeimkvótann" álvers hugmyndum?