Er bannað að gefa vinum sínum 2000 krónur?

spurði Guðjón Arnar Kristjánsson ný endurkjörinn formaður Frjálslynda flokksins í fréttum áðan þegar hann var spurður hvað honum fyndist um það að ákveðnir aðilar hefðu greitt einstaklingum fyrir að kjósa rétt í varaformannskjörinu á landsþingi flokksins. 

Á ég að trúa því að sjóaður formaður í íslenskum stjórnmálaflokki sé með svona málflutning? Já því miður virðist lýðræðishugsjónin hjá þeim armi Frjálslynda flokksins sem studdi innkomu Nýs afls í flokkinn og Magnús Þór Hafsteinsson áfram sem varaformann flokksins gegn Margréti Sverrisdóttur vera á þessu plani. Einnig vekur það athygli að einn liðsmanna Nýs afls studdi flokkinn um 200.000 kr. skömmu fyrir landsþingið. Einhvern veginn þurfti að launa það. 

Uppgjör Margrétar Frímannsdóttur við flokkseigendafélag gamla Alþýðubandalagsins vakti verulega athygli nú á haustdögum þegar bók hennar Stelpan frá Stokkseyri kom út. Sú saga sem þar er rakin virðist vera að endurtaka sig hjá nöfnu hennar Sverrisdóttur. Sá er þó munur þar á að Margrét Sverrisdóttir er úr þeim armi Frjálslynda flokksins sem kenna má við flokkseigendur. Það var jú Sverrir Hermannsson faðir hennar sem stofnaði flokkinn og samkvæmt fréttum á hann nafnið á flokknum.

Hvað býr eiginlega að baki þessari aðför að Margréti Sverrisdóttur? Óbeint er það hin nýja afstaða þeirra sem nú ráða för í flokknum í málefnum innflytjenda, sem óneitanlega ber keim af rasískum málflutningi, samanber setningarræðu formannsins. En hvað býr þar að baki? Ég held ekki að það sé pólitísk sannfæring heldur einfaldlega eftirsókn þessara manna í þingsæti, góð laun, þægilega vinnu., skemmtilegt vinnuumhverfi og að ekki sé talað um betri lífeyri en gengur og gerist hjá öðrum þjóðfélagsþegnum.                                                                                     

Jón Magnússon hefur gengið með þingmanninn í maganum frá því á síðustu öld en varð ekkert ágengt innan Sjálfstæðisflokksins. En nú var lag. Mikil fjölgun erlends vinnuafls, sem eins og Jón Baldvin Hannibalsson benti réttilega á í Silfri Egils fyrr í dag, bjargaði íslensku efnahagslífi frá algjöru skipsbroti, kallar á kenndir hjá ákveðnum hóp landsmanna sem flestum meðborgurum blöskra. Á þessar kenndir skyldi spilað svo sitjandi þingmenn og nýliðinn Jón Magnússon og einhverjir með honum komist á þing.  

Margrét Sverrisdóttir á ekkert erindi með þessum mönnum. Það er hennar að ákveða næstu skref. Ég held hins vegar að það sé morgunljóst að þau skref hljóta að leiða hana burt frá íslensku rauðhnökkunum.

Athugasemdir

[Áslaug Sigurjónsdóttir, 28.1.2007 kl. 21:10]

Ég vona hreint út sagt að hún yfirgefi þennan mannskap, sem hefur ódrengilega sagt obinberlega að hennar þátttaka í varaformannskjörið væri ekki formanni þóknanlegt.  Ekki vildi ég vera í þessum félagsskap.  Svo segja þeir að hún hafi það mikið fylgi að þeir vilji ekki missa hana.  Hvað er eiginlega í gangi í þessum flokki. 

[Dofri (IP-tala skráð) 28.1.2007 kl. 21:27]

Þetta er með ótrúlegustu setningum sem maður hefur heyrt úr munni forystumanna í pólitík og er þá mikið sagt. Það er megn spillingar- og hrútalykt af þessu öllu.

[Einar Sigurjón Oddsson, 29.1.2007 kl. 05:07]

En ER bannað að gefa vinum sínum 2000 krónur?

Stjórnmálamenn borga allir fyrir atkvæðin sem þeir fá. Þetta gera þeir þó með mismunandi hætti. Ég sé ekkert að því borga 2000 kall fyrir atkvæði. Það er betra en að borga með bitlingum þegar í embættið er komið. 

[Sjensinn Bensinn, 29.1.2007 kl. 11:01]

Góður pistill hjá þér Sigurður.

Nei Einar, það er ekki bannað að gefa 2.000 kr, en það er algjörlega siðlaust.

Frjálslyndir komu af stað þarfri umræðu en því miður var pökkunin og umgjörðin á þessari umræðu þeirra ótrúlega léleg. Við eigum að hafa skoðun á fjölmenningarsamfélaginu, ekki hræðast það en heldur ekki vera með hræðsluáróður. Frjálslyndum tókst samt á alveg ótrúlegan hátt að klúðra þessari umræðu, hún er bara fyndin í dag.

Ef þetta er hið rétta andlit Frjálslynda, þá er það frekar ófögurt.